مناشدة من طالبة الى وزير التربية والتعليم

 أرجوا أن تكون هذه الرسالة مكان إهتمام موقعكم الصادق والصريح

مرحبا .... انا طالبة اول ثانوي علمي ... وشكوتي بتتعلق بمدرستي والصراحه حابه كتير ابل ما افيد حالي كوني السنه الجاي انا توجيهي .. حابه افيد المدرسه كلها ...

هلئ الصراحه انا طول سنوات دراستي اللي مرت وانا كنت بمدارس خاصه وما عمري فكرت اني رح اسجل بمدرسة حكومه الى ان شاءت الظروف وعلى اهم مرحله بحياتي الدراسيه وسجلت بمدرسة ( اسكان ياجوز ) عالصف الاول ثانوي ...الفصل الاول مر وكان من اسوأ الصفوف علي من الناحيه الدراسيه ... حكيت ممكن لاني متعوده على مستوى اعلى حسيت بالفرق بس بعدين وجدت الموضوع اسوا من هيك .....

اول شي ... في نقص بالمعلمات يعني ( معلمات الصفوف الاساسيه بدرسو صفوف الثانوي )

سؤالي اللي حابه اعرف جوابو هل انو مستوى معلمة الصفوف الاساسيه مؤهله لتدريس الثانوي يعني هل مؤهلاتها الدراسيه تسمح لها بايصال المعلومه الصحيحه وبالطريقه الصحيحه لطالبات التوجيهي مثلا ؟؟؟

تاني شي ... استغربت كتير لما عرفت انو ما في معلمة علوم ارض في كل المدرسه حتى لطالبات التوجيهي ومر الفصل الاول ومعلمة الفيزياء تدرس طالبات التوجيهي علوم ارض مع العلم انو مو تخصصها ... ومعلمة الكيمياء درستنا علوم ارض الاول ثانوي وكانت تقرا عن دليل المعلم واذا سألناها عن معلومه او شي تحكيلنا هاد مو تخصصي وما بعرف يعني مشا الفصل الاول بدون معلمة علوم ارض بس بتمنى توصل رسالتي لاعلى حد بالتربيه وانا ما عندي مانع اني احكي معو واوضحلو مشاكل مدرستي لانو انا ممكن اكون قادرة اني اسجل بمراكز واجيب اساتذه خصوصي او حتى ارجع على مدرسه خاصه بس في طالبات وضعهم ابدا ما بيسمح بهلشي ومن حقنا كطالبات نوخد كل المواد بالطريقه الصح وتوصللنا معلومه صح وحتى انو انلائي اجوبه لاسألتنا لانو احنا لساتنا منتعلم ....

( بتمنى الحل بسرعه لانو بلش الدوام الرسمي )

هلئ ما بعرف ازا هلبرنامج بحل هلنوع من المشاكل بس الصراحه ما عرفت ابدا لمين الجئ ... بتمنى ازا كانت رسالتي بالمكان الخطأ دلوني علمكان الصح لحلها وانا بكون شاكره الكم كتير

نادين عدنان العلي