شفة واحده لا تصنع فما
أبو يوسف يقلب صفحات جريدة, جديده و لا قديمه, من الجرايد المرميه في القهوه، حين قرأ أن أبو لطفي لم يستطع أن يضم شخصية لامعه فذه كفوؤه مخلصه لشلته. و السبب إنو ألاخ معو جنسيه ثانيه غير جنسية البلد.
و كعادة أبو فهمي, ما ينذكر إسم أي شخصية عامه أو مهمه أو فنيه أو زعرنجيه، حتى ينبرى و يتحدث عن عمق صداقته بهذه ألشخصيه.
فورا أبو فهمي عدل طاقيتو و سحب كرسيه و لزق في أبو يوسف و قال: هظا الزلمه صاحبي، و كنا في الابتدائي سوا، و إشتغلنا معلمين بعد المترك سوا في القرية. بس بعدين أهلو متمكنين و درسوه بره و صار ما شاء الله في البلد. بس إلشهاده لله، عمرو ما نسيني و كان يتفقدني, و مره عينلي ابن اختي في الضريبه عندو.
راح تقولي كيف أخذ جنسيه ثانيه, يا سيدي يا أبو يوسف، صاحبي كمل لدكتوراه و اشتغلو سنتين و كلو في كندا، و إحسبها، هذول بيطلعو اكثر من عشر سنين. و طبعا أخذ إلجنسيه ميشان رسوم الجامعه بتصير أقل عليه، لانو صار كندي إبن بلد، و هيك بيوفر، و كان متزوج، و هيك أولادو بيروحو عالمدارس ببلاش و تأمين صحي و ضمان مجاني و قرض ميسر لشراء بيت و غيرو و غيراتو.
يعني إلجنسيه مربحه إلو، و بتوفر عليه كثير خاصه بعد ما أبوه باع أخر شقفة أرض و هو بنص الماجستر.
طيب يا عم أبو فهمي خليه يتنازل عن الجنسيه و شو بدو فيها هسه. بلاش يعيش في بلده بحقوق منقوصه، من شكل ثاني غير اياه.
سلامة فهمك يا أبو يوسف ما بيصير، حتى و لو تنازل عنها. ما بيطلعلو يصير وزير ولا نائب ولا مجلس بلدي حتى. لازم يظل سحيج و لا يرجع بره. بس بيطلعلو ينتخب.
يا سلام يا أبو فهمي ، يعني قصو حق الانتخاب و الترشيح من النص. و كيف هاظا الحكي.
طول عمري بعرف إنو حق الانتخاب و الترشيح. هو حق واحد ما بينقسم مش حقين ملزقين مع بعظ.
الله الله و مين العبقري اللي قسمو.
ماشي و طبعا كندا كمان قصتلو الحق. لأ لأ يا ابو يوسف. في كندا و غيرها بيسمحولهم و هاي دول بتفهم ما بتقص حق الانتخاب و الترشيح من النص. شو هي كاينه قرص جبنه ولا راس جميد، وحد الله يا زلمه.
ألفم يا ابو يوسف يتكون من شفتين، شفه فوق و شفه تحت، لما تقطع وحده منهم، ما بيصير زلمه بفم, بيصير زلمه بشفه. ميشان هيك الازعر اللي قاعد هناك في القرنه، اسمو أبو شفه.
معليش يا ابو فهمي البلد فيها زيو و بيجوز أحسن منو. ما وقفت عليه. راح تمشي الامور بدونو.
يا عم ابو يوسف مرات بحسك غبي و ما بتفهم علي. انا بقلك قصو الحق اللي هو واحد و ما بينقص، حق الانتخاب و الترشيح و عملو حقين. ما صارت هاي.
سمحتلو يكون سحيج - عفوا بس ينتخب- و على ايش محملينو جميله. ما اطلبو منو يعمل اقامه و يدفع غرامات اذا اتجاوز الاقامه زي السيرلنكيات، حتي يعرف حالو.
ابو يوسف رجع يقرا الجريده و هو يتمتم, أنا مش عاجبني هالموظوع و مش عاجبني انو بيفصلو الامور زي ما بدهم. اعوذ بالله يا زلمه من هيك شغلات بتحس انو اللي بيعملها ممكن يعمل أي إيشي عاطل و مؤذي للبلد و المواطن.
يا أخي يا هو مواطن أو مش مواطن.
يعني صار عنا هسه في البلد؛
مواطن كامل برقم شاصي و جنسيه وحده بيتخب و بيترشح و بيكش حمام ونائب في البرلمان.
و مواطن نص، برقم شاصي و جنسيتين بينتخب بس و ما بيكش حمام.
و مواطن بدون رقم شاصي، الشاصي ممسوح و لا بينتخب و لا بيترشح.
و مواطن اصلو من قبائل الهوهو من بلاد السفندي و إلو كل ايشي بدون ما يتنخب و حصته محفوظه و مصانه و جنسيته الثانيه الاصليه في الحفظ و الصون, بيوخذها وقت ما بدو و بيطلعلو يصير وزير و نائب كمان.
و مواطن مطرود من بلده و ممكن يصير شيخ عشيره او شاويش مخفر و على طول.
و مقيم بدون جواز لانو متجوز بنت من البلد و أولادو الله أعلم. مع انو كل الدول لما تتجوز من بناتها بتوخذ جنسيتها. و حتى لما بتنولد فيها كمان بس احنا لأ. اي اعطوهم هالجواز ميشان بناتنا ينفقو . بتعرف يا اخي ابو فهمي، يمكن هاي بتحل مشكلة العنوسه. يعني لعيبة السله اللي الله اعلم من وين همو يوخذو الجواز بلمح البصر ميشان يتنطنط بكرة السله عالفاضي و المنتخب بيهم جاب المركز السابع و بدونهم كان راح يجيب البطوله.
اي انا بعرف بلاد جنبنا، طلعت قانون إسمو عودة الكفاءات للبلد و أعطوهم بيوت و سيارات و رواتب عاليه بس ميشان يرجعلو للبلد مع انو كلهم معهم جنسيات أجنبيه ثانيه و شغل و مرتاحين في بلاد بره. أزيدك من الشعر بيت, قسم منهم صار وزرا و غيرو.
طيب يا أبو فهمي، ليش لما ابن البلد في بلاد بره ينجح في إنتخابات بلديه أو نيابيه أو يصير عمدة بلد أو وزير أو رئيس حتى، بنفرح و بنهلهل و بنكتب عنهم بالجرايد فرحانين؟
بعد هيك، لا حدا فيكو يسولف و يغرد عن موضوع هجرة العقول.
الحق واحد لا يتجزأ و الظلم واحد مهما تعددت اشكاله و أي خلل في المعادله يؤدي الى إنعدام العداله و إنعدام العداله يؤدي للي بدناش ايه. عفوا اللي همه ما بدهم اياه.
اللهم إحييني لليوم الذي أرى فيه ألمسوؤل في بلدي يخشى و يخاف و يرتجف قبل ان يؤذي مواطن. مواطن. مواطن. مش شبه او نص مواطن. يا حبيبي يا أبو فهمي ما سمعت بالمثل اللي بيقول: إذا رأيت نيوب الليث بارزة،،، عندها إعرف إنو معجون سنانه أصلي!!!!
و إذا حلقو لغيرك، بلل راسك و إستنا دورك!!!!!
