عبر الأثير

يا من تملكون البث عبر الأثير ... ارحموا آذاننا واحترموا عقولنا شوي , يا ربع الاذاعات الاعلام مش هيك ,,يعني بتمشي بالسيارة بتفتح الراديو بدك تسمع شي محترم كونه الاذاعات الاصل فيها تبقي على اصول مهنة الاعلام دون تشويه يصيبها كما يصيب وسائل الاعلام الاخرى وبتتفاجأ ...بتحط ع أول محطة عأساس انها فضاء عام وبكون الحوار كالتالي :

ـ الو ..

ـ الو ..

ـ مين معنا بالاتسال عالخت ؟! .

ـ هئ هئ هئ أنا اسيل الدلوعة هههههه

ـ اهلا بأسيل ..أكيد بتحبي المنسف

ـ يا الله يا الله شو بحبه للمنسف وخصوصا بجميد ال...

وبنكتشف بهذه الاثناء انه البرنامج خاص ومحور الراديو كله لدعاية جميد وطحينية !

انا بعرف انه الدعاية ثواني والمادة المبثوثة للارتقاء بالمستمع هو صاحب المساحة الاكبر من وقت الاثير وليس العكس .

بنرجع للحوار :

ـ شو اعملتي اليوم وشو هوه فطورك اليوم أكيد منسف مع جميد الل..تسأل المزيعه.

ـ اليوم انا سحيت السبح ورحت عملت شوبينق واشترينا جميد وطحينية ال..عشان ما بنعمل اكلنا الا فيها وانا مروحة زرت عمتي وبعدين اشتريت بلوزة جديدة وقمر الدين للسحور ورجعنا للبيت غيرت اواعيي وبلشت احضر مع ماما للطبيخ منسف ,انتوا بتعرفونيش بالمنسف باكله بادي مو بالمعلأة ,وبعدين نظفت غرفة الضيوف عشان عازمين بيت آنتي و و و و وشو كمان يا اسيل شو يا أسولة عملتي اليوم بديش انسى شي..

(انا بجاوبك شو انسيتي ..نسيتي تخبرينا انك شخيتي كمان)

يا اخوان مشان الله الارتقاء بالوسيلة الاعلامية ليس بهذا الطرح الحرفي عبر الاعلام الاذاعي الاردني الذي طالما اعتززنا وافتخرنا به ,والدعاية والاعلان لا تتطلب كل هذا الانحطاط في الاعداد البرامجي الذي يعتبر لنا جميعا وليس للمنسفجية والتجارجية.

برنامج ثاني بعد صلاة العشا بتحط عليه تروق ’وإذ بمذيع مُنظِّر يبث كلامه بهدوء ورومانسية حتى يضفي جوا على طبيعة برنامجه من نبرة صوته فيبدأ بمط نياعه وبنفس الوقت يلوق شدوقه ويتحدث عن الحب ,وفنون الحب والمعذبين والمعذبات ثم ياتيه اتصال ..

الو

الو مسا الحب

مساء الخير اتفدلي مين معنا يا اختي العاشقة

انا مها

اها مها احكيلنا عن ما يجول به خاطرك

انا كتير تعبت معه وما بيفهمني وجبتله بعيد ميلاده ورد وحطيتله آآآآآد عالفيس وهو مطنش وناسي موعد عيد ميلادي وما بجيبلي ورد هئ هئ هئ

المذيع..اهدي وروئي مها بلكي هوه مشغول ونسي الموعد أو بلكي ما معه فلوس يشتري ورد

ــ لا لا لا هوه مو ملتفت لحبي ومشاعري كل هالأد ,ما بعرف شو أعمل وكيف اتسرف معه ,,أبعد ولا دل أريبه منه ,,أدل احبه ولا أبتِّل أحبه,,نفسي انتحر نفسي اموت دلوني شو اعمل يا استاز

(انا بقللك شو الحل ,,الحل بدك طخ انتي واللي بيسمحلكوا تبثوا هيك برامج)

في الحقيقة الكثير من برامج الاذاعات الاردنية الخاصة او حتى الرسمية بدأت تنهار في رسالتها وطرحها للأسوأ حتى تجذب المستمع الأتفه

فما بين مقعقع ومقهقه وبين عاشقة تطلب نصيحة من مذيع وتشكو حبيبها مع انه شو دخلنا نسمع مشكلتها مش عارف وبين ناس طابخين منسف ع جميد او عاملين سلطة بطحينية انهارت آخر وسيلة اعلامية بقيت متماسكة بعبقها وأصالتها سنين طويلة وبات عقل المستمع غير محترم وأذنه ليست من اهتمامات القائمين على الاعلام الاذاعي بقدر ما هي اهتمامات بالتوافه والدعايات الاعلانية وبنات العهر في اخر الليل

سامحوني انا مو فلسفجي انا متلكم منسفجي وبحب وبنحب وروح قلبي الضحك بس في اشياء ما فيه داعي تاخد كل هالمساحة من وقت الأثير وبهذا الاسفاف بمسألة الخصوصية واشهارها على الملأ ولا فيه داعي نعبر عن فجعنا بمنسف مصنوع من جميد او لبن بقر

عادي يعني ما في داعي تبرزونا بهالاسفاف ,,ترى في مستمعين غير اردنيين ومن خارج الاردن بسمعونا ,,,ارحوا سمعتنا كشعب كمان.

وتسبحوا على خير