"بحب في الراجل فلوسه" و"قبلاتي محترمة"..فيفي عبده تصرح!

المدينة نيوز :- بعد كل ظهور إعلامي لها تثير الفنانة والراقصة "فيفي عبده" الجدل بتصريحاتها التي قد يعتبرها البعض غريبة، وتصدرت "فيفي عبده"، موقع التواصل الاجتماعي الشهير "تويتر" بعد ظهورها ببرنامج "العاشرة مساء" مع الإعلامي وائل الإبراشي المذاع على قناة "دريم". نقدم لكم مجموعة من التصريحات المثيرة التي أطلقتها "فيفي عبده" في مناسبات مختلفة..

1- الرقصات طافحين الدم:

صرحت الفنانة "فيفي عبده" في برنامج العاشرة مساء: "في ناس في مهنة الرقص محترمات جداً، وطافحين الدم في شغلهم"، وأبدت استيائها من راقصات العري قائلة: "إيه الراقصات اللي بيرقصوا بالأندر وير في الشوارع، طلعوا منين؟.. إيه المصيبة السودا دي؟.. إزاي دي تبقى رقاصة زيي وأنا طافحة الدم؟"، وأضافت: "إحنا طول عمرنا بنروح شغلنا ونرجع ونحفر في الصخر وسط النار ومنتحرقش، وبنشتغل ونتعب ونتحمل المسئولية".

2- كان فاضلي البيت الأبيض
"كنت راقصة كبيرة جدا، برقص لعظماء القوم الموجودين في العالم، وبعدين قولت أمثل علشان الناس تعرف شكلي"، وأضافت: "كان ناقص أروح أرقص في البيت الأبيض"، فرد عليها الإبراشي: "ياريت كنتي حليتي لنا أزمات كتير".

3- موشي ديان البعبع

"كنت مع جوزي في فرنسا، وشفت بنت فلسطينية في التليفزيون بتتخانق مع موشي ديان، وكنت مش فاهمة حاجة وخايفة، وكنت معزومة مع جوزي رايحين باب الأسانسير ولقيت الزفت دا قدامي"، وأوضحت فيفي عبده أنها صممت على مغادرة الفندق بسبب وجوده فيه.

4- البنت هي اللي بتعاكس الولد
"الحب أوقاته بتختلف، ودلوقتي غير أيام زمان، والوضع اختلف بشكل كبير.. وممكن تلاقي إن البنت هي اللي بتعاكس الولد".

5- قبلاتي لا تخدش الحياء
أوضحت الفنانة "فيفي عبده" أن كلمتها المفضلة "5 مواه" لا تعتبر خدش للحياء، قائلة: "5 بوسات خدش حياء؟!"، وتابعت: "أنا بوزع قبلات لمعجبيني".

6- ارقصوا في البيت هتخسوا
في حوارها مع الإبراشي، نصحت فيفي عبده السيدات اللاتي ترغبن في إنقاص الوزن، قائلة: "امسحي الشقة.. أنا عشان أخس مسحت الشقة لما طفحت الدم"، وأضافت: "ارقصوا في البيت هتخسوا"، موضحة أن ساعة الرقص في المنزل تعادل 5 ساعات على ماكينة السير".

7- جابوا منين الأم المثالية دي
أبدت الفنانة فيفي عبده استيائها من استهانة البعض بتلقيبها بالأم المثالية، وقالت: "اللي كتب كدا غير محترم لأن الأم أم"، وأضافت: "أنا اتكرمت في النادي دا مليون مرة، ولما روحت ماروحتش علشان أنا الأم المثالية ولا عندي فكرة عن الموضوع دا، وماعرفش جابوا منين الأم المثالية دي، ولا يهمني أكون الأم المثالية".

8- علم إسرائيل تحت رجليا:

عندما سألها الإعلامي وائل الإبراشي عن أهم شخصية عالمية رقصت أمامها، فقالت فيفي عبده: "كنت بشتغل في مينا هاوس ودخلت ماكنتش عارفة مين اللي جوه، فطلع بيجن بتاع إسرائيل موجود في مينا هاوس، وأنا برقص حد رمى عليا العلم الإسرائيلي على أساس إن أنا أمسكه"، وتابعت: "روحت حاطة العلم الإسرائيلي تحت رجليا وواقفة عليه، وقولت يا أحلى اسم في الوجود يامصر"، "تاني يوم وأنا جاية لقيت من أول الباب اللي بره كله مليان ورد لغاية ماطلعت القاعة فوق، الناس بتحتفل بيا إن أنا عملت كدا".

9- بحب في الراجل فلوسه
أثناء حلولها ضيفة ببرنامج "100 سؤال" المذاع على فضائية الحياة في شهر أكتوبر عام 2015، سألتها الإعلامية "راغدة شلهوب": "أحب في الرجل"، فأجابت: "فلوسه".

10- مرعوبة من الآخرة
في حوارها ببرنامج "100 سؤال" قالت فيفي عبده: "مرعوبة من الآخرة"، وأضافت: "مش عارفة الرقص حرام ولا حلال".