جمعة الـ أبصر شو

مرحبا , إصلاح النظام إصلاح النظام .. وكل جمعة مسيرة وكل يوم إعتصام .. ممكن أفهم مين لازم يصلح النظام ؟؟؟ قلّة ميكانيكية مثلاً ؟؟؟ وادي الرمم مليان مصلحين .. روحوا وصلحوا النظام يا عمّي ...

الموضوع مش بهالبساطة بعرف .. ويوم عن يوم صارت الأمور بتِقْرِفْ .. كاميرا واحدة تسقط نظام .. يافطة ولوحة وكثرة كلام .. بتشكوا من السرقة وبدكم عفو عام .. ما يشمل فلان بس فلان حرام ..

إللي فوق مش شِعِر .. إللي فوق شَعَر طِلع ع لسان الواحد وهو يحكي .. وما حدا شَعَر وشمّها وفهم القصة وخجل ..

أي نظام بدو إصلاح ؟؟؟ ممكن يسعفني واحد بإيضاح ؟؟؟

مين أوّل واحد بيسأل عن واسطة عشان ياخذ الرخصة ؟؟؟ رئيس الوزراء ؟؟؟
مين أوّل واحد بيحاول ياخذ دور إللي قدّامو بالدوائر الحكومية عشان يختم معاملتو ويلحق يخلص باقي الروتين الحكومي ؟؟؟ مدير المخابرات ؟؟؟
مين أوّل واحد بيقطع الإشارة ع الضو الأحمر ؟؟؟ مدير الأمن العام ؟؟؟
مين أوّل واحد بيفوت بشوارع محطوط عليها إشارة قد راسو ممنوع المرور ؟؟؟ وزير الداخلية ؟؟؟
مين أوّل واحد بيعترض على أسعار البنزين بس مستعد يدفع راتب الشهر لحضور مباراة برشلونة أو ريال مدريد بكافيه محترم مع الشلّة ؟؟؟ وزير الزراعة ؟؟؟
مين ومين ومين .. مين الحريص على كسر النظام والتململ المستمر منو ؟؟؟
مين ومين ومين .. ومين إللي بيطلع مسيرات اليوم ؟؟؟

مش أنا وإنت وهو وهي أوّل حدا شجّع ع الفساد ؛ تطنيش القوانين ؛ التعدي على النظام ؛ الكذب ؟؟؟؟ ومش إللي بِكسر الشغلة لازم يصلّحها ع حسابو ؟؟؟؟ إحنا كسرنا النظام .. إحنا مجبورين نصلّحو .. لا دولة ولا معالي فلان ولا أي لقب وبعدو فلان ...

نصيحة : بس جرّب على مستوى رخصة السير , مش بيتداولوا شائعة بتقول إنو حتى لو شو ما كانت واسطتك لازم ترسب أوّل مرّة ؟؟؟ عظيم .. طيّب جرّب ما تسأل عن واسطة من أوّل مرّة وروح قدّم .. بتخسر شي ؟ ما إنت هيك هيك راسب .. إذا قدرت تنتصر مرّة واحدة على حُب الفساد بقلبك .. رح تنتصر كل الدولة بمحاربة الفساد ..
وبتصير كل يوم جمعة بدل ما تروح تطالب بإصلاح النظام .. وتكثّر كلام .. يا إمّا تروح تصلّي .. يا إمّا تروح تنام .. بلاها هالمسيرة .. بلاه هالإعتصام ..