لحد هاللحظة في ناس مش فاهمة شو بصير بحي الشيخ جراح ...

المدينة نيوز:- لازم نفهم قصة حي الشيخ جراح في مدينة القد و سبب القيامة الي قايمة هناك ...
* حي الشيخ جراح حي صغير جدا يقع شمال المسجد
الأقصى
* سكان حي الشيخ جراح هم ٢٨ عائلة مهجرين من بلدانهم وقراهم سنة ١٩٤٨
* تم تسليمهم الحي باتفاقية مع وكالة اللاجئين الاونروا والمملكة الأردنية ، وبالاتفاق انه رح يتم تسليمهم اوراق ملكية الأرض بعد ٣ سنوات من تاريخ الاتفاقية

* طبعا بسنة ال ٦٧ صارت نكسة جديدة وتعرقلت قصة تسليمهم أوراق الملكية زي دايما عند العرب كلشي معرقل
* ال٢٨ عائلة صاروا حوالي أكثر من ٥٠٠ فرد ، كلهم مهددين من سنوات بالطرد والاخلاء ، لأن الاحتلال الواطي بحاول يثبت ملكيته لأراضي حي الشيخ جراح بحكم موقعه الاستراتيجي المهم ، ولأنه احتلال عنده اختلال بالانسانية وكل القيم .. وكأنه الهم عنا اشي أصلااا
* المهم لحد يومنا هاد الاحتلال لم ينجح باثبات ملكيته لأرض الحي ، وسكانه من سنوات بيعانوا من مضايقات المستوطنين ، حتى بعام ٢٠٠٨ -٢٠٠٩ ، انحكم على عائلة الكرد في الحي بشطر منزلهم نصفين . نص الهم والنص التاني لعائلة صهيونية، الحكم صادر من محكمة صهيونية واطية ،
تخيل تكون نص دارك الك والنص التاني عايش فيها محتل مختل وتدخلوا من نفس البوابة عالدار وتكون عالدرج طالع نازل تتقابل فيه ،
المهم ضلت عيلة الكرد متناصفين منزلهم مع مستوطن لحد يومنا هاد ، وطبعا مضايقات وكلام وأفعال وتخيلووا
*عائلة الغاوي وعائلة حنون ب ٢٠٠٩ خسروا منازلهم بالكامل وضلهم سنين عايشين بخيام مقابل منازلهم ، ويتأملوا المستوطنين طالعين نازلين من بيوتهم . تخيلوا كمية القهررر
* وأخيرا سنة ٢٠٢١ اليهود مش ناويين يجيبوها البر ، الي بصير تطهير عرقي،، نكبة جديدة ، بدهم يطردوا كل أهالي الحي ويهدموا بيوتهم ويستبدلوها بمستوطنات يعيش فيها المستوطنين

القدس كانت ومازالت وستبقى عربية فلسطينية اسلامية