أنوشكا: الهجوم على الراقصات غير مبرر "مفيش فرح من غير راقصة"
المدينة نيوز :- ردت الفنانة أنوشكا على هجوم نشطاء مواقع التواصل الاجتماعي على الراقصات وفن الاستعراض بشكل عام، مؤكدة أن الرقص الشرقي فن راقٍ.
وقالت أنوشكا في تصريحات صحافية: "مفيش فرح من غير راقصة، حتى راقصات الشمعدان بدأوا يرجعوا تاني، ولكن كان فيه فترة كنا بنعاني من أفكار ضبابية، وعقليات رجعية بيهاجموا الرقص الشرقي والاستعراض بجميع أشكاله، رغم إنه فن راقي".
وأضافت: "الاستعراض فن راقي، زي فرقة رضا واللي بتحمل اسم مصر في الخارج ولازم نواجه الأفكار الهدامة واللي بتهز مكانة الاستعراض، والاستعراض زي أي فن وزي التمثيل ممكن المخرج يقدم مشهد اغتصاب بدون ما يكون فج ويوصل المعنى للمشاهد، والمشكلة تكمن في نظرتنا إحنا".
وكانت أنوشكا قد كشفت سابقاً عن رأيها في تقديم سيرتها الذاتية في عمل فني، قالت: "حياتي فيها إيه عشان أقدمها؟، أعتقد من الأفضل تقديم شخصيات خدموا الإنسانية زي الدكتور مجدي يعقوب، ولو هنقدم قصة حياتي ممكن تكون قصة صعود لأننا ملهمين للجمهور وبيقلدونا وأنا حياتي مكنتش كلها نجاحات.
وأضافت: أنا مريت بإخفاقات كتير وسنين من التعب والتعلم، وتأثرت بالشخصيات الأكبر مني زي والدتي والفنانة سناء جميل وكنت بتعلم منها وبشوف بتتعامل إزاي، ووالدتي كانت ناقدة لاذعة ولكن جميع نصائحها كانت في محلها رغم أنها كانت متفرجة عادية".
يذكر أن أنوشكا تشارك في دراما رمضان الحالي بمسلسل "الأجهر" الذي يقوم ببطولته الفنان عمرو سعد بجوار عدد كبير من النجوم، منهم: سيد رجب، درة، خالد زكي، محمود قابيل، عمرو عبد الجليل، عارفة عبد الرسول، أحمد مجدي، سارة سلامة، نور النبوي، أحمد صفوت، محمد جمعة، مصطفى أبوسريع، وهو من تأليف ورشة ملوك وإخراج ياسر سامي.
