نمرة حمرا

المتابع لتصريحات المتتابعة من وزير المالية و التلحينات التي تليها من التلفزيون الرسمي الناطق الرسمي باسمها يجد ان الوضع المالي للحكومة تعبان جدا ...يعني لا مناص من زيادة الاسعار لا سيما اسعار المحروقات ...اي و الله اشي بحرق الدم
طيب يا صديقي ابو حمور ما في حلول الا زيادة الاسعار لسد عجز الموازنة ...طيب فكر شوي ....اكيد ما لقيت حل غير زيادة الاسعار لانه اكيد في ناس مش فارقة معهم شلن ولا بريزة زيادة في اي سلعة لانه ربنا معطيهم بس كم نسبتهم بالبلد 10 -15 % على اكثر تقدير و ما تبقي يا صديقي وزير المالية فارقة معهم و الشلن بفرق معهم و حتى القرش
طيب اعطيك انا حل ...ما دام مجلس الوزراء بهمهم مصلحة الوطن و قاتلين حالهم عشان الشعب ...ممكن نستبدل كل سيارت الوزراء من مرسيدس او جيب و شفرليه ام اللى هونداي او كيا زيهم زي بقية الشعب ...ممكن سيارات النواب بصفتهم خدام للشعب يركبو سيارت زي الناس الي بخدموهم ...و الي بدو يركب سيارة فارهة يركب على حسابو الخاص مش على حساب المواطن التعبان ...و نفسي واحد من المسؤولين الي قتلونا تنظير و حكي و شد احزمة و ازمة مالية و الوضع الصعب نفسي اشوفه واقف بستنى باص ولا سرفيس ...مهو كيف بده يشعر بشعور المواطن ما دام راكب سيارة بتصرف بنزين قد 5 عيل مستورة ...
و بالاخير عند سؤال ...بالعيد كانت الدوائر الحكومية معطلة بس السيارات الحكومية اكيد لا ...بالعيد كل سيارات الحكومة كانت مداومة بدوام اضافي كمان لانه بتعرفو لازم المسؤول يوصل رحمه عشان الحكومة ينوبها اجر الاخ المسؤول بوصل رحمه بسيارة الحكومة و اصرف بدل بنزين و مين سائل ؟ المواطن بدفع ....الشعب الاردني كفو قدها و الله ...
عندي كمان سؤال ....هسه الموظف الحكومي ذو المنصب الكبير اسمه "مسؤول " طيب ليش تعارف الناس على تسميته مسؤول مع انه في ارض الواقع غير مسؤول ...مش ملاقي حدا يسأله ...بس اتذكر اخي المسؤول قوله تعالى:( وَقِفُوَهُمْ إِنَّهُم مَّسْئُولُون ) الصافات 24