بصراحة أنا السبب

منذ ان انتهاء المؤتمر الصحفي لوزير المالية سليمان الحافظ وعبارته: (دلونا على من نهب المال العام خلينا نقبض عليه الآن) ما زالت تؤنب ضميري...
منذ أمس وأنا أفكّر بتسليم نفسي لسليمان الحافظ طواعية،بما يليق بسمعتي وتاريخي اللصوصي، قبل ان يشي بي أحد المغرضين ويكلّف معالي الوزير عناء البحث عني وإلقاء القبض عليّ وتصويري وأنا مغطى العينين ومقيد اليدين:
لذا منذ صباح الغد- ع البَرَاد - سوف أتوجه الى وزارة المالية وأسلّم نفسي لسليمان الحافظ، بشرط ان يجهز لي طاولة طويلة وعليها شرشف ابيض لعرض المسروقات عليها، واذا طلب مني تمثيل جرائم «النهب» والسطو أنا حاضر أيضا :
* سليمان الحافظ: ها يا ابني ..احكيلي كيف سرقت الفوسفات؟
* أنا: سيدي الله يلعن الشيطان ..فكرت انه ما لها أصحاب ...اخذتها خطف، وثاني يوم بعتها بسوق «الحرامية»..بعدين اكتشفت سيدي انه كل الجرايد بتحكي عنها!!
* سليمان الحافظ: طيب وين رحت بمصاريها؟؟
* انا: على الملذّات سيدي!
*سليمان الحافظ: على الملذات ها؟...غيره.. شو سرقت؟؟!
* انا : سرقت مصاري الأستاذ التحول آل اقتصادي!! وجزدان الآنسة الفاضلة مساعدات الخارجية!...
* سليمان الحافظ: وين رحت فيها؟
* انا: على الملذّات سيدي!
* سليمان الحافظ : شو كمان؟؟
* انا: أُمنية سيدي!
* سليمان الحافظ: انت كمان اللي سرق امنية؟..
* أنا: سيدي أنا معذور ..اشمعنا كل الناس عندها اماني... وانا ما عندي امنية!
* سليمان الحافظ: طيب وكمان؟
أنا: غسلت أموال سيدي ..
* سليمان الحافظ: شو؟؟
* انا: (بأيدي هذول اللي بده يوكلهن التايد)
* سليمان الحافظ: وين رحت فيهن ولااااا؟؟
* «بحّيتهن» بالاقتصاد الوطني سيدي؟
سليمان الحافظ: وغيره؟؟
* انا: (للامانة) سيدي سرقت شوي من امانة عمان سيدي، ومشان أزيد (المورد) سرقت موارد، والبوتاس، وانا اللي ورطتهم بقصة الكازينو..
* سليمان الحافظ: طبعاً وصرفت كل هظول على الملذّات!
* أنا: لأ سيدي!
سليمان الحافظ: لعاد وين؟
أنا: على المنكرات سيدي!
سليمان الحافظ: ظل اشي؟
انا: سكن كريم..سيدي
سليمان الحافظ: أيواااه..قلي شلون سطيت ع سكن كريم!!
أنا: سيدي انا ظليت فترة اراقب كريم كل يوم هو طالع ع شغله ..فصرت اعرف متى بيطلع من سكنه ومتى بيرجع... ويوم لقيت ما حدا شايفني ولا حدا مراقبني..فــ...رحت سرقت: «سكن كريم»!
سليمان الحافظ: وين صرفتهن؟
انا: نصهن على الملذّات ونصهن ع المنكرات سيدي!
سليمان الحافظ: شو اعمل فيك...بعد ما خرّبت سمعة الشرفاء من ابناء الوطن المخلصين اللي اتهموا زورا بالفساد...وثوّرت الشارع وهيّجت الحراك..وخرّبت البلد..شو اعمل فيييييييك؟؟؟؟
انا: عادي سيدي..اعمل مؤتمر صحفي بنقابة الصحفيين بكرة وقول لهم : (( خلص الآن قبضنا ع اللي نهب المال العام) لذلك فيش حراك شعبي فيش زيادة أسعار فيش عجز موازنة...والحمد لله على نعمة الأمن والأمان.
كلاكيت ..مسلسل (بصراحة انا السبب)
: اللقطة 111 ......المشهد 13.... الحلقة المفرغة ..
فايف..فور..ثري..تو...كيووووووو! ( الرأي )