شكوى على سفارة الأردن في واشنطن ( نص الرسالة )

المدينة نيوز - خاص - وصلتنا هذه الشكوى من مواطن أردني في أمريكا ننشرها كما وردت :

" انا مواطن اردني مقيم بكالفورنيا وواشنطن بعيدة عني ٥ ساعات طيران ،،واذا بيلزمني شي من سفارتنا الاردنيه بواشنطن يستوجب اني اراسلهم او احكي تلفون معهم ،، طبعا التلفون سلامه تسلمك ماحدا برد عليه ومرات بنحاول على مدار الاسبوع نحكي ومابجاوبو،،واذا جاوبوك ماببلو قلبك ولابساعدوك ،، وهاي اسأل عنها اي مواطن اردني ورح يحكيلك عن قصص صارت معاه من خلال هالسفارة ،، مع انهم يا اخي ماشيين على النظام الامريكي لكن ما بطبقو منه الا الاشياء الي بمصلحتهم ومصلحه موظفينهم .

طبعا انا الي معامله عندهم بدي اعمل وكاله لوالدي بالاردن والوكاله مستعجله جدا ولازم اختمها من وزاره الخارجيه الامريكيه ومن ولايه كالفورنيا ومن كاتب عدل محلي ( طبعا هاي الاختام السفاره لاردنيه طالبيتها منا مش القانون الامريكي بيلزمنا نعملها ) ،، وسفارتنا ما بتقبل تصادق على اي ورقه لمواطن اردني الا اذا صادقت عليها وزاره الخارجيه الامريكيه،، طبعا انا ختمت الورقه من كل الوزارات الامريكيه المعنيه وراسلتهم بالبريد وارجعولي ياها بالبريد وكلو تمام وسهله الامور كانت وما تأخرو علي،، المعامله حاليا مدقرة عند سفارتنا كمرحله اخيرة ، وصارلي اكثر من شهرونصف بستنى مع انهم كاتبين على موقعهم بأنو المعامله بيلزمها ٥ ايام عمل،،
وشوف هالشغله المسخرة ، لما بعثت المعامله للدوائر الامريكيه ارجعولي ياها ودفعو هم رسوم البريد،، سفارتنا طلبو مني على طج الختم 85 دولارا ،، مش هون القصه تخيل انهم طالبين مني ابعث مع المعامله مغلف فارغ وعليه طابعه علشان يرجعولي المعامله من خلاله بالبريد،، يعني مش سافطين يحطو طابعه عالمعامله بقيمه ٤٣ سنت اقل من نصف دولار مع اني دافعلهم ٨٥ دولارا،،
تخيل معامله تجديد جواز بتكلفك ١٥٠ دولار غير رسوم البريد ،، اغلب المواطنين الاردنيين هون لما بدهم يجددوا جوازاتهم ببعتوها عالاردن وقرايبهم بجددوها وبرجعولهم ياها بالبريد السريع،، ومابتكلفهم كل القصه اكتر من ٣٠ دينار،،، طبعا سفارتنا ما بتخلي المواطن بحاله ولازم تمص دمه بالداخل والخارج،،فاتنبهو لهاي المسأله وحطو على موقعهم وبالبونط العريض تحذير للمواطنين الاردنيين بأنو لا تبعثو جوازاتكم عالاردن تجددوها لأنو وزاره الخارجيه الامريكيه رح تصير تصادر هاي الجوازات وهي بطريقها اليكم ،، يعني يامواطنين يا اردنيين لا توفرو ع حالكو مصاريكو واعملو الجوازات عن طريقنا والا ستصادر هاي الجوازات،،،
مع انو تحذيرهم هاذ كاذب والهدف منه تخويف الناس بس،، وزاره الخارجيه والدوائر الامريكيه هون ما بتصادر اي معامله بريديه وما الها علاقه اصلا بهاي الامور،،

التعليمات الي حاطينها على موقع السفارة والله وانته بتقرأ فيها بتخاف وبصيبك احباط ولو تشوف قديش بصعبوها عالواحد بدل ما هم يكونو عنصر مساعد النا ونلجألهم ويساعدونا،،

لي صديق سعودي حصلت معه مشكله كان بيسوق بدون رخصه وحاط بنته الزغيرة بحضنه وهو بيسوق مسكوه البوليس واعتقلوه،، قمنا حكينا مع السفارة السعوديه عشان يساعدوه،، والله العظيم بخلال ساعتين كان مندوب من السفارة السعوديه بمخفر الشرطه تكفله ودفعوا عنه ٥ الاف دولار الغرامه وردو اعطوه 5 الاف دولار هو ومرته حتى يدبرو امورهم ع بين مايرجعو عالسعوديه( هم طلاب وكانو بعد شهر راجعين عبلادهم).
يعني شوف الفرق بين تعامل سفارتهم معهم وتعامل سفارتنا) ،
والله ياخوي الفساد ناخرها نخر هون واطقع من الاردن الفساد بسفارتنا هون.
اه نسيت احكي شغله ..
التلفون الي حاطينه عشان تتصل عليه، عدا عن انهم مابردو عليه،، محددين وقت الاتصال من الساعه ١٠ الصبح للساعه ٢ ، اربع ساعات بس، ومش مراعيين فروقات التوقيت بين الولايات يعني انا اذا بدي اتصل معهم ،، بدي اصحى من الفجر واظل احاول طول النهار وبجوز اعطل شغلي بهذاك اليوم عالفاضي هاظ اذا ردو اصلا،،

يا اخي انا مواطن اردني معي جنسيه امريكيه،، حصلت معي مشكله وانا بالاردن اتصلت عالسفارة الامريكيه وتدخلت السفارة وطلعوني من مشكلتي وانا ببلدي وبين اهلي بس لاني مواطن امريكي ومحسوب عليهم .

احنا مابدنا سفارتنا تتدخل وتساعدنا بأي شي، بس عالاقل تمشيلنا المعاملات والاختام علشان نمشي امورنا بالدوائر الحكوميه الي بالاردن الي مش سلمان منها لا المغترب ولا المقيم ، مش سلمان من تنشيف الدم ومرمرة المواطن حتى ينهي معاملته،، 

والله انا بحكي ومقهور ومحروق كثير على معاملتي لو تعرف قديش مهمه ومهم انو اوديها للاردن بأقصى سرعه،، بس ياريتهم شاعرين بالواحد ومسهلين عليه .. 
اي الشخص المتجنس امريكي .. حتى وهو بالاردن بيكون معاه رقم مباشر بيحكي مع القنصل بحالات الطارئه وبردو عليه حتى لو بنص الليل .. احنا سفارتنا ازغر موظف فيها ما بتنازل يرد عليك عالتلفون ..