نقوط

في صالة العرس وعند اقتراب انتهاء الحفله يتقدم المعازيم للسلام عليك للمباركه ( والتنقيط ) .. كل ما اسلم على واحد بقولي مبروك .. خلص (بنجييك على البيت ) بدون ما ينقطني لا انا ولا العروس ( كاش ) .. واحد ورا واحد على هالسولافه هاي ... ( بنجييك على البيت ) .. يعني افهم من كلامهم انهم بدهم ينقطوني بالبيت .. اقترب مني واحد وقلي مبروك .. قلتلو الله يبارك فيك عقبال عند ولادك يا رب .. قلي اسمع انا .. قلتلو لا اتكمل .. ( بدك تيجيني على البيت ) .. قال هاي هي .. بالظبط .. اللي بعدو .. انت برضو بدك تيجيني على البيت .. قلي شو عرفك .. قلتلو لا عادي .. كنكم متفقين مع بعض .. قال انت عارف الدنيا بنص الشهر ومش حامل الواحد بجيبتو هسه يعني مصاري انت عارف الظروف .. لا عارف .. عادي .. الله يعين الناس .. واذا ما بدك تيجيني على البيت برضو عادي ... اللي بعدو .. مبروك .. اللخه يبارك فيك .. بتعرف .. والله بعرف .. انت فرحتلي من قلبك وراح تيجيني على البيت .. رد علي .. السلام عليكم .. وعليكم السلام .. شرفتنا ...اللي بعدو ... طبعا زوجتي وقعت بنفس مقولة ( بنيجيكي على البيت ) من معازيم النسوان .. وعلى هالموال . لما انتهى العرس وروحنا انا وزوجتي عدينا النقوط طلعوا مجموعهم( 31 ) دينار .. هذا الدينار منين اجا ما بعرف .. يمكن واحد دفع ليره نقوط اللي مجامله وروح مشي هذاك اليوم ... الله يخلف عليه ... واطلعنا بمقولة ( بنيجيك على البيت ) بما يعادل 100 مره مكرره .. مع سبق الاصرار والترصد .

اجانا اول واحد على البيت سلم علينا ونقطنا ( مكوى ) .. والثاني مكوى .. والثالث مكوى .. والرابع ( منشر غسيل ) والخامس ( منشر غسيل ) .. المهم استمرت الوفود للمباركه من الاهل والاصدقاء والمعارف لمدة اسبوع ...

اقتربنا من هالكراتين اشي كبير واشي صغير وقلنا خلينا انشوف هالنقوط .. خلينا انشوف مقولة ( بنجيك على البيت ) شو افرزت ..

1- مكوى صيني عدد (13 ) تقريبا نفس الماركه واللون .

2- منشر غسيل صيني عدد ( 9) تقريبا نفس الماركه واللون .

3- ساعة حائط صيني عدد (16) تقريبا نفس الماركه واللون . بس الأوقات مختلفه .

4- طقم فناجين قهوه صيني عدد (11 ) تقريبا نفس الماركه واللون .

5- طقم كاسات شاي صيني عدد (12) تقريبا نفس الماركه واللون.

6- برواز صيني عدد (4) وهي ( اية الكرسي ) و ( الله اكبر .. على كل من طغى وتجبر )

و ( رأس الحكمه مخافة الله ) و ( انا لله وانا اليه راجعون ) .

ومن بين النقوط كيس بلاستيك عند ما فتحناه لقينا فيه باكيت ( كبة نبيل ) و ( رقائق سمبوسك ) .. هذول ليش مش عارف .. شو جابهم هون .. برضو مش عارف ... شو علاقة ( كبة نبيل والسمبوسك ) بالعرس والنقوط والزواج .. برضو مش عارف .. ومين خطر على بالو يجبلنا مثل هذي الاشياء .. هو انا قلتلك يوم بدي ( كبة نبيل وسمبوسك ) .. وسألت زوجتي حكيتي
لحدا انو جاي على بالك ( كبة نبيل وسمبوسك ) .. قالت .. لأ ... هو مين جابهم وشو خطر على بالو يجيب مثل هيك انقوط .. راح يظل لغز وامر غامض الى يوم الدين.

طيب شو قصة المكاوي ؟ .. وشو قصة مناشر الغسيل .. هو انا ساكن ( بدراي كلين ) ... هو انا جاي اتجوز ولا جاي اغسل واكوي .. واراقب الوقت ..

اتفقت مع واحد ( ادوات منزليه ) يشيلهم كلهم ( شيله بيله ) واعطاني فيهم (50 ) دينار .. واحتفظت ببرواز واحد بس الا وهو (الله اكبر .. على كل من طغى وتجبر ) ..

اجانا ولد ولدين ثلاث كل النقوط على مكاوي ومناشر غسيل وساعات ... نفس الدائره ونفس الموال ونفس السولافه ... بدنا شيء يساعدنا بحياتنا .. يا جماعه بدنا شيء نتفائل فيه بحياه جديده .. خاصة ببداية الزواج ... لا حياه لمن تنادي .. هو هالمكوى ومنشر الغسيل اللي عليك عليك ..حبك توخذهم خذهم ما حبك حطهم بحضنك واطلع على ساعة الحيط استنى الفرج ..شو السبب وشو تفسير هذه الظاهره ..ما بعرف . .. ولا راح اعرف ... ولا بدي اعرف .

حياتنا صارت روتينيه مثل النقوط .. كل حدث له نفس الطابع ونفس الروتين ونفس النهج ونفس الافكار ونفس الطريقه ونفس الاخبار ونفس السياسه ونفس المشاكل والازمات ونفس اسباب المشاكل والازمات ونفس الحلول .. اشي بكوي .. واشي بغسل .. واشي بنشر غسيل .. واشي براقت الوقت .. واشي لا يعنيه الوقت ... واشي بمزمز على فنجان قهوه وبنظر واشي بمزمز على كاسة شاي وبراقب الناس والاحداث ... واشي صافن بهالبرواز اللي قدامو بتأمل بنوع الخط والاطار ونوع القماش والخشب ويبدي رأيه ونظرتو بهذا العمل الفني المتقن .. لكن اخر اشي بطلعلوا هو شو مكتوب جوا البرواز شو هي الحكمه .. ويمكن ما يلتفت اليها ولا يعتبر منها ابدا .. همه المنظر الخارجي واتقان صنع اللوحه بدون التمعن او النظر او يتعظ بما هو مكتوب جواتو .
النقوط ما نفعنا بأشي .. تعالوا شوفو ... حياتنا مجعلكه ... وكلها بقع .. والوقت مقسم على وجبات الاكل .. لا تنتبه له الا وقت الجوع ... وفعلا اثقل دم مخلوق قلي ( خلص بنجييك على البيت ) هو الفقر .. اجا باركلنا .. وبركلنا وهات اللي يطلع. لليوم.

ملاحظه : ( كبة نبيل والسمبوسك ) عملناهم (شوربة فريكه ) ثاني يوم زواج .

والسلام عليكم