أبو سالم وأم سالم في حوار عن الموازنة

المدينة نيوز – خاص – كتبت ميس رمضان - : سمعنا بأذن الخيال   هذا الحوار الهامس  بين وزير المالية محمد أبو حمور ، والسيدة عقيلته  ،  وخرجنا بهذا اللقاء الذي اخترعناه بناء على قياس الحال الإقتصادي في البلد ، وننشره على سبيل الدعابة والكوميديا السوداء ، بيض الله ايامكم  : 
 أبو سالم : من يوم ما استلمت وزارة المالية وأنا في صداع دائم ، ولولاكي يا ست الكل كان انجلطت  ألف مرة .
 أم سالم : سلامتك يا محمد ، بس لا تضحك كثير الكاميرات علينا ، وإنت وزير مالية ، خليك جدي .
 أبو سالم : كل يوم أضطر للضحك على الناس عن النمو وعن نسبة المديونية ، بدنا نمشي الحال يا مرة ، منتي شايفة الأوضاع الإقتصادية في العالم ، بس إحنا الحمد لله ، أحسن من غيرنا .
 أم سالم :   ، حكيت لك لما كنت في هيئة التخاصية إنو خصخصتكو راح تخرب البلد ، ومن يوم ما كنت في البوتاس صارت المصاري تصب في جيوب القطاع الخاص وانحرمت منها الخزينة ، لا تفكرني ما بعرف  .. كل أنفاسك حافظها عن غيب .
 أبو سالم :شو هالحكي يا ولية ، الخصخصة كويسة .
أم سالم : شو سوت الخصخصة اللي بتحكي عنها ، شغلت العاطلين عن العمل ، حركت الإقتصاد ، منتا شايف كل يوم اعتصام وكل يوم تفنيشات ، والناس ماكلة هوا .
أبو سالم :  خلينا في المهم .. اليوم عندي مؤتمر صحفي بدي أقلب طواقيهم .
أم سالم : طواقي مين ؟
أبو سالم : الشعب .
 أم سالم : شو بدك  تقول ؟
 أبو سالم : بدي أزرع إلهم البحر مقاثي ، وأحصد إلهم ملح البحر الميت ، بدي أخليهم يشعروا إنا أفضل من سويسرا ، أتركيها علي .
 أم سالم : بس الناس ما بينضحك عليها يا محمد ، العالم عايفة التنكة ومو ناقصهم أفلام .
 أبو سالم : أفلام شو يا مرة ، بدي أحكي بالأرقام  وما حد راح يفهم حاجة .
 أم سالم : من يوم ما استلمت هالوزارة وأنت تقول وفرنا 100 مليون ، وفرنا 200 مليون ، وفرنا 300 مليون  ، يا رجل لا تتخوثوا على العالم  ، لو حسبنا المبالغ اللي وفرتها من يوم ما صرت وزير مالية كان سدينا المديونية ، إحكوا بالعقل ، الناس  مش هبلة ! .
 أبو سالم : والله كنت فاكرك مثلهم بتصدقي أرقام الحكومة !
 أم  سالم :   وحد الله يا محمد  . ول .. أنا أم سالم  .. ألله يسعد هالضحكة إن شاء الله .