رسالة من مواطن اردني للملقي حول قانون الضريبة

المدينة نيوز : تداول ناشطون عبر مواقع التواصل هذا التعليق بخصوص قانون الضريبة الجديد والذي جاء على شكل رسالة من مواطن لرئيس الحكومة هاني الملقي وننشرها تاليا كما وردتنا :

سيدي الرئيس ..
على شو بدك تدفعني ضريبه ؟؟
أولادي بدرسوا على حسابي بمدارس خاصه
انتوا بتعرفوا كيف بندبر اقساط مدارس اولادنا ؟؟
مستشفيات وأطباء على حسابنا طبعا مش ممكن نروح عالمسالخ تبعتكم !!
على شو بدك تدفعني ضريبه ؟؟
على شوارعكم الزباله ؟
على شو بدك تدفعني ضريبه ؟
على حق سياره انت ماخذ اضعاف حقها مني ضرائب وجمارك ؟
على شو بدك تدفعني ضريبه ؟
على ضريبة المبيعات الي تجاوزت الضعف ؟ ولا على ضريبة الضريبه ؟
على البنزين الي بتاخذ حقه اضعاف ؟
ادفع ضريبه على بيتي الي بتدفعني مسقفات كل سنه عليه وهو ملكي !!
ادفع ضريبه وانت عامل ضريبه 56% على خط تلفوني !!
ادفع ضريبه وانت كل سنه بتدفعني ترخيص على سيارتي مبلغ وقدره !!
حتى متعتنا الجنسيه ، شرع الله عم ندفع عليها ضريبه !!
كل هذا ومش مكفيكم !!
ما ضَل شي ال ورفعتوه ، الناس صارت تدخن اردأ انواع الدخان لانكم رافعين عليه ضريبه خرافيه !!
الناس صارت تلبس أرخص الملابس وتقنع نفسها انها فله !!
الناس صارت تختصر طلعه ولا طشه لانها صارت تكلف ميزانيه ربع شهر !!
حتى رمضان وحتى العيد راحت بهجتهم لانه الواحد صار يفكر بمصاريفهم !!
بتفكر تفتح مشروع ، الكوابيس بتلاحقك كل ليله بسبب قوانينكم ومفاجآتكم !!
لا تقلي امريكا وبريطانيا والإمارات وتركيا وكل أوروبا ، بس تصير خدماتكم مثلهم ودخلنا مثل دخلهم بتقدر تحكي ، همهم خدمة شعبهم مش مثلكم فقط لغرض الجباية وطز يا مواطن !!
كل هذا ولسه بترفع !!
ما ضَل غير رجلينا ..