اقوال المشاهير

(اقوال المشاهير ) دائما هيك سبحان الله اقوالهم مسموعه ومتواتره ومنقوله ويستشهد بها .. ليش ؟ .. لأنو مشهور .. مثل مطرب او ممثله او عالم فيزيا او كيمياء او اي شخصيه عرفت على مستوى الجماهير بأي مجال ... ابدا هيك بصير هذا الزلمه متتبع لكلامه ما بنطق عن الهوى .. كل كلامهم يعتبر حكم ومواعظ وواضح الرؤيا ومستكشف المستقبل ..

يا اخوان طيب ان بتحداكم في ( فقراء ) او ( اغنياء ) بغض النظر او ناس بسطاء كل يوم بخرج من افواههم مليون وخمسمية الف مليون حكمه ومقوله .. وفش حدا داري عنهم ولا بجيبوا سيرتهم ولا بستشهدوا بأقوالهم .. ليش ... لأنو مش مشهور ... مش شخصيه معروفه .. مش شخصيه مهمه .. اخبط وانت قاعد بقعده ما بتشوف واحد مسترسل بالحكي وغايص في لركبو بنط وبقولك في 2 اذار عام 1861 قبل الميلا قال مارتن لوثر مقولته المشهوره ( اعطي الخبز للخباز ) .. وهذا الزلمه فهمان وذو رؤيه وسابق زمانه وهي كلامه فعلا أجا ... بنط بعد اشوي بقولك وفي 3 نيسان 1712 عند ما اجتاحت او قامت او اتسخمت او اتنيلت او عطست بلد فلان طلع واحد مشهور من المانيا ولا فرنسا ولا من بنغلادش وقال مقولته المشهوره ( اقلب الطنجره على ثمها بتطلع الطنجره هي والمقلايه خوات ) يا سلام .. ويسترسل وهذا ان دل على شيء دل على هذا الشخص كان ذو رؤيه وهذا الذي يحصل معنا الان .. برجع وبكمل حديثه .. خذ مثلا ابو جابر شو قال بأحد فقرات كتابه المعروف ( البين يطسك ) صفحه 13 فقره 11 شو بقول ... اسمعوا يا جماعه بقول ( يمكنك استخدام ابريق الوضو بسقايه الزريعه ) وهنا ظهر الاختلاف بين فريقين مؤيد ومعارض ودارت حروب بينهم استمرت 300 عام على الفاضي .. واحنا يا جماعه بنشوف حالنا وسط هذه الميمعه مش عارفين راسنا من رجلينا ..

وبظل يسترسل ويستشهد بجون وبسميث وابو جابر والحجه رهيجه وسمعان الاكتع وجاكلين ميني مورو ورأفت تشارلز واينشتاين سليم محي الدين وبحشي بحديثه مليون شهر وتاريخ وسنه ومقوله.. وفي شهر ابصر شو وفي عام ابصر شو قبل الميلاد وبعد الميلاد وبالعصور الوسطى والعصور الخشبيه وبحرب الفشك وبثورة البطاطا وبالتطهير العرقي وبالتطهير ( الاعتيادي المعروف ) ...

عمرهم ما جابو سيرة ( ابو نجوى ) شو قال وشو حكى .. هذا ابو نجوى زلمه فقير معدوم عديم المواهب لكن مارق عليه تجارب الحياه اكثر من انشتاين ومن نيوتن ومن ارمسترونج ومن المتنبي ومن امرؤ القيس ومن عادل امام وفيفي عبده والرقاصه دينا ..

اش معنى اذا قالت الرقاصه دينا جمله بحفله او بقعده او بالتلفزيون اخبط وبتنشهر جملتها وبتسير نبراس نهتدي فيه ونستشهد فيه ونستدل بأقوالها لتدعم حديثنا بالاقناع .. طيب ابو نجوى ليش ما تستشهدوا بأقوالو .... لا .. وأيش .. تعال وشوف المقولات اللي بقولها المشاهير ثلاث ارباعها لا بتقدم ولا بتأخر .. مجرد اقوال عاديه بسيطه وانا متأكد ما قصد فيها اشي الزلمه .. بس كونها يعني صادره من رجل او امرأه معروفه مشهوره ابدا غير شكل لها وزن وقيمه .. ويمكن الزلمه يعني ما قصد فيها الاشي العظيم لتصبح قانون او مثل او مأثوره يعني ... شو هالاشي الكبير والكثير ذو قيمه حكاه يعني ..

في واحد وهو بنظر بقعده قال بعام 1201 في شهر (يويو) في رجل عرف بعلمه بالكيمياء وكان من سكان فلورنسا قال بعد صلاة المغرب ( عليكم بالمهلبيه ) التقط هذه المقوله احد الحاضرين وكان رجل اعمال وفورا عمل بها وعممها وانتشرت بأوروبا وحققت نقله نوعيه بالاقتصاد الاوروبي الى اعلى المستويات وأحنا العرب حانت لنا هذه الفرصه لكن لم ندرك قيمة هذه المقوله فتأخرنا عن الغرب .... هسه احنا يا حج يعني كان ناقصنا هذه المقوله لتخلينا نقفز قفز بالاقتصاد .. وشو يعني ( عليكم بالمهلبيه ) وبقص ايدي من الكوع اذا هذه المقوله اللي قالها الزلمه واللي قالها غيرو ساهمت بتقدم او بتأخر البشريه اقتصاديا واجتماعيا وسياسيا .. بس خلص طالعه من ثم زلمه او مره مشهوره وعليم الله كان هذيك الليله لما قال هاي المقوله او الجمله كان طافي سكران محشش ومش عارف وين الله حاطو .. يعني ( ابو نجوى ) زلمتنا الفقير قال مره (يا حاشر حالك بين البصله وقشرتها ما بنوبك منها الا ريحتها) والله شايف الزلمه صادق اقرب للواقع من مقولات انشتاين كلها ... من مقولات مارتن لوثر كلها .. شوف العبره والاسترسال والصوره الشعريه والبلاغيه بين البصل وقشرته .. شوف التعبير المجازي بين رائحه البصل ورائحة الثوم .. شبه البصل بالتدخل الخارجي والانهيار الاقتصادي .. شوف كيف اشار من بعيد بتطور وتنمية المجتمعات وتحقيق الانتصارات .. شوف .. شوف كيف اخذ البصله رمز للحريه والديمقراطيه والانفتاحيه والعولمه .. ما انا لازم اقعد افسر واحلل وازيد واطول واقصر بمقوله ( ابو نجوى ) لعاد .. وهو يا حرام ما قصد فيها اشي قصد ( البصله بصله والريحه ريحه وبس ) .. بس احنا بنحب انمغط بالسولافه .. بنحب ( انمغــــــــــــــــــــط ) بأشي حكاه فلان ولا علنتان ... وبنفسر وبنحلل وبنطلع من مقوله الرقاصه دينا مليون حكمه ومليون قانون ومليون تفسير ومليون نظريه وبطلع من مقولتها مدرسه فكريه تنتشر بدول عدم الانحياز بالعصور المظلمه .

انا مثلا بقول باليوم مليون جمله .. الله اكبر ما بطلع منهم كلمه ولا مقوله تنتشر بين الناس وتؤخذ كمقوله عالميه .. ولا عشني فقير ومش معروف ... بلاش انا .. انسوني .. انا زلمه هبيله على باب الله .. في ناس كثير ومنهم مثلا يوجد اغنياء كثر يعملون بالاقتصاد بالظل وغير مشهوريين ولا يسلط عليهم الضوء بطلع منهم كل يوم مليون نظريه ومقوله اقتصاديه اقسم بالله انها مقولات حقيقيه وواقعيه ناتجه عن تجربه ومعرفه ومع هيك الناس ما بتسأل عنهم ولا عن شو بقولوا .. ليش .. لأنهم مشم مشهوريين .. مش معروفين .. اكثر المقولات التي تستشهد بها الناس اجمال حقيقة كلام الفنانيين ... واسرع اخبار تنتشر هي اخبارهم .. اذا عطس اذا راح على الحمام .. متابعين تفاصيل حياتهم التافهه بكل كبيره وصغيره .. ويا حرام ابو(جابر /سليمان /يونس ..) وام ( اسعد /سعيد /سعاده /عابس ...) هذا الزلمه او الفتاه ( الفقريه / وهي مأخوذه من الفقر التي يرجع اصل الكلمه الى العمود الفقري اللي بكون واضح وظاهر للعيان من الضعف وقلة الاكل ) واللي مش قادرين يشتري حبة دوا والا رغيف خبز ما بعرفوا عنهم اشي وهم جنبهم .. ها .. مش ابعاد عنهم .. جنبهم .. بس خبر عن ( اليزابيث تايلور ) انها اتزحلقت بالحمام ولا انحرق اصبعها وهي تعمل قلاية بندوره كل العالم بدرى عنها لعاد .. وبعملوا معها لقاء صحفي وبتبلش اتنظر واتقول حكي فاضي وبعدها كلامها يؤخذ على اعتبار انه مقولات مأثوره تتوارثه الاجيال ... يا رب .. بس .. بديش احكي .

بقولك قال الكاتب الفيلسوف بسخريه بعام 1902 بشهر (تشرين الرابع) يوم السبت الساعه العاشره صباحا وكان بحاله يأس شديده وقال مقولته المشهوره ( لا تأكل بيض مسلوق واتروح اتنام ) .. وأخر .. قال فلان وهو متجهم بعام 1916 وقالت فلانه وهي نائمه وقال علنتان بعد خروجه من الحمام وقال وقالت وقال وقالت وقال ثم قالت ثم لم يقل شيئا .. انا بدي اقول هاي المره .

احسن الكلام هو ( كلام الله ) والاحاديث النبويه الشريفه الصادقه الحقيقيه .. هي من يجب ان نستشهد بها .. الاستشهاد بكلام الله وبكلام الرسل والانبياء والصحابه والتابعين الصادقين المؤمنين تلك هي مفاتيح الحل والسعاده الدنيويه والسعاده بالاخره والفوز العظيم .. تلك هي نبراس تلك الامم .. كل الامم .. هي التي تنير طريق الصواب والحق والمنطق والعقل والعمل والاجتهاد .. نلك لاشياء العظيمه هي الصادقه وهي التي يجب ان نستشهد بها .. ومش والله قال فلان وقال علنتان ..

مما يساعد بعض الناس ان يكون كلامهم مسموع اما قدره مكتوب ان يصبح مشهورا منذ ولادته ومنهم من تأتيه الفرصه ليصبح مشهورا ومعروفا لدى الناس عن طريق المسابقات او المعارف او بطريقه او بأخرى صحيحه او ملتويه العلم عند الله ... ومنهم سبحان الله لديه الموهبه والعلم والعقل والذكاء يفوق عقل انشتاين ونيوتن وابن الهيثم بس خلص .. قدره هيك يظل مغمور ومش معروف وبموت وعلمه وذكائه وقدراته ومهارته لا تعرف ولا تنشهر ولا يستفاد منها هيك قدره او لم تأتيه الفرصه وهكذا ..

خفوا علينا قال فلان ولا علنتان .. احكي انت .. ليش شو ناقصك .. شو بفرقوا هذول اللي بحكو عنا وبتنشهر مقولاتهم.. كلنا ولاد تسعه .. وكل واحد الو لسان وعينين وايدين .. يا اخي قلك مقوله او حكمه من كلمتين ثلاث كلمات شو دراك يمكن تنشهر ويشار اليك بالبنان ... قال فلان . بركي ظبطت معك .. هي انا ليل انهار بقول حكي ومش طالع معي ولا حكمه .. او انو الناس يا أخي بتحبطني .. كل ما أجي اقول حكمه او اقول هيك مقوله معتقدا انها ستلاقي ترحيب او اقبال او انتشار الله وكيلكم اول ما بصدني زوجتي ثم اهلي ثم جيراني ثم اصدقائي واصحابي ومعارفي ومن ثم الناس على قولة ( يا زلمه عيرنا اسكوتك .. سيبنا منك .... ما ظل بالخم الا ممعوط الذنب .. يا اخي ماخذ بحالك فيلم .. غيرك كان اشطر .. قوم شفلك شغله احسنلك من هذا الحكي الفاضي ... ) مع اني شو قلت .. قلت مره مقوله نصها ( سيأتي زمن على الناس ما تلاقي توكل ولا تلاقي رغيف الخبز ) قالولي اسكت .. شو جبت اشي جديد .. وين عايش انت .. اللي بسمعك بقول عنك شبعان خبز ؟؟ ما صرلنا 100 سنه عايشين هذي المقوله .. والله انت يا حج مش سابق زمانك انت متأخر عن زمانك 300 سنه لورا ... معقول .. ما ظبطت معي .. بلاش خذو هاي المقوله لعل وعسى تنتشر ويستشهد بها الان وفيما بعد بالعصور الذهبيه اي بعد مليون سنه بركي قالو في واحد هبيله قبل مليون سنه اسمو ( برهان ) قال ( اذا اردت ان تعمل مجدره عليك اولا ان تحضر الرز والعدس اولا ) .. قويه هاي .. امنيحه .. اكويسه .. ( في أمل ....بق .. الجمل ) .

ملاحظه : روح يا شيخ منك لله .. ضيعت وقتنا على حكي فاضي .. انت يا بتردح يا بتهسهس .. منك لله بس ... / حر أنا .. حدا قلك تقرا مقالي .
والسلام عليكم