اردنيون غرقى في عرض البحر وتلفون محمد بيك الناطق بالخارجية ممنوع ( صور )

المدينة نيوز – خاص وحصري – صور : لا ندري بماذا سيعقب وزير الخارجية على ما جرى مع 6 شبان اردنيين غرقت الباخرة التي كانت تقلهم في عرض البحر أثناء كانوا بطريقهم إلى دولة آسيوية ، وتم إنقاذهم وهم الآن في الهند ينتظرون من يتصل بهم من سفارة بلدهم ليعرفوا أخبارهم أو يطمئنوا ذويهم ..
صباح الإثنين وصلتنا هذه الصور من شقيقة أحد الأردنيين ممن كانوا على متن الباخرة ، ووزعت نفس الصور على المواقع الإخبارية ، ولكننا لم ننشر الموضوع على أمل أن نتحقق مما ورد في الصور والخبر بشكل عام ، ومن هنا بدأت رحلتنا مع وزارة الخارجية ، وتاليا ملخص تسجيلي لما جرى بيننا وما بين السفارة .:

المدينة : يا أخوان ، بدنا العمليات ..

الخارجية : العمليات ، طيب ..

المدينة : مرحبا : بدنا العمليات يا أخي ، أو المسؤول عنها ؟؟ .
العمليات : مين بيحكي ؟؟

المدينة : إحنا المدينة نيوز ..
العمليات : أهلين ،، بس ما في حدا مسؤول هون .. شو تفضلوا ..

المدينة " يا أخي سمعنا إنكو بتابعوا قصة الباخرة الغرقانة وعليها 6 أردنيين تم إنقاذهم في الهند ؟؟
العمليات : سمعت بهيك شي ، بس ما بقدر أفيدك ..

المدينة : ول .. ليش يا رجل ؟؟
العمليات : ما عندي صلاحيات ، لازم تحكوا مع محمد بيك ..

المدينة : مين محمد بيك ؟؟
العمليات " محمد بيك الكايد ، الناطق باسم الوزارة ، هو المسؤول ..

المدينة : طيب مو مشكلة ، اعطينا تلفونه ..
العمليات : ما عندي التلفون ، وبصراحة لازم أستاذنو بالأول ..

المدينة : تستأذنو منشان تعطيني تلفونو ؟؟
العمليات : لحظة بالله .
...

العمليات : والله ما في حد من الشباب عندو تلفونو ,.. على كل حال إرجع على المقسم واطلبو وبيعطوك إياه ..

...

المدينة : مرحبا : بدنا تلفون محمد بيك الكايد بالله ..
المقسم : مين بدو اياه ..

المدينة : المدينة نيوز ..
المقسم : أهلين يا مدينة ، بس والله محمد بيك مش موجود ،

المدينة : اعطينا تلفونو ونحنا بنحكي معه ...
المقسم : والله يا مدينة ممنوع نعطي أي تلفون ، على كل حال اعطيني تلفونك ومحمد بيك بيتصل بيك ..

المدينة : هو محمد بيك مداوم والا معطل اليوم ..
المقسم : مش عارف والله ..

هلو .. هلا .. هلو ..

انقطع الخط .

تخيلوا : حصلنا بعد اتصال مع أهل أحد الاردنيين في عمان على رقم الفندق الذي ينزل فيه الاردنيون في الهند وهو 00918861416141 ولم نحصل على رقم محمد بيك ، الناطق باسم وزارة الخارجية .

كل ما كنا نطلبه وما نزال أن نعرف مصير مواطنين أردنيين قطعت بهم السبل وبعث أحدهم بهذه الصور ، ومن ثم انقطعت أخباره ..

من يتابع قصة الأردنيين يا ابا ناصر العزيز ، وما رأي محمد بيك بالموضوع ؟؟

الصور المرفقة بعث بها أحد الأردنيين لذويه فأرسلوها للمواقع الألكترونية صباحا .. ولكن يبدو أن محمد بيك لم يرها بعد ، أليس هو الناطق باسم وزارة الخارجية الأردنية ؟؟ .

حمى الله الأردن .